Frivillige i Allu
PIUMASSUTSIMINNIK SULISUT ANERSAAKKUT IMMERSUIFFISSAMIK KALAALLINUT EFTERSKOLE-RTUNUT PILERSITSIPPUT
Kajumissutsiminnik sulisut qulingiluat tapersersuillutik kaammattuillutillu kalaallit efterskole-rtut neqeroorummi ilaarusussimapput. Neqeroorut Allu-mik ateqarpoq kalaallisullu isumaqarluni puisip sikumi allua. "Angerlarsimaffimmit ungasissumiinneq qanoq misiginarnersoq nalunngilara taamaaliallaannarlu qallunaatut piviusoq takusariaqarlugu kalaallisuumit allaanerujussuusoq nalunagu. Artornarsinnaasarpoq", 26-nik ukiulik Nicolas Skifte Damgaard oqarpoq, Allu-mi kajumissutsiminik sulisoq. Nicolas Copenhagen Business Academy-mi markedsføringsøkonomi-mut iseqqammerpoq nammineerlunilu Kalaallit Nunaanniit efterskole-riarnikuulluni nalusimanagulu ilaquttat ikinngutillu qimannissai artornartussaasoq. Nicolas aamma ittoortarsimavoq. Nicolasip nalusimanngilaa qallunaatut efterskole nukinik atuiffiusussaasoq. "Ilimagaara tamanna peqqutaalluni aniguisimassasunga. Aaliangersimasumik isummeqqallunga angusaqarluarusukkama."
Nicolas: "Efterskole-rnerma ingerlalluarnissaa pingaartinnikuuara". Nicolasip nukissat pisariallit atorlugit efterskole naammassinikuuaa. Kajumissutsiminnik Allu-mi sulisut weekend-imi angalaarnissaat aaqqissortarpaat inuusuttunullu kalaallinut Danmark-imi efterskole-ni atuartunut attaveqaasiornernut ikiuisarluni inuusuttunut namminermisut nukissaqanngitsunut ikiuerusulluni. Allu-mi kajumissutsiminnik sulisut allallu sulisut Kalaallit Nunaanni atuartut qimannikuusatik assinganik attaveqaasiortarput. Suliamik naammassinninnissamik pisariaqartitsipputMaren Ottar Hessner politikkimut tunngatillugu Efterskoleforening-imi siunnersortiuvoq Lise Lyngby Binderup-ilu ilagalugu misissuisimalluni inuusuttut kalaallinut efterskole-rtunut naammassinninnissamut pisariaqartitsisunut suliniutit misissorlugit. Marenip isumaani suliniuteqarnerit pisariaqarput ingammik kalaallit uniinnartartut eqqarsaatigalugit. Maren nassuiaavoq:"Danmark-imi efterskole-rneq artornartuuvoq oqaatsillu piorsarsimassuserlu alla aamma ammaffigisussaallugit suliaq imaannaanngitsuulluni. Kiserliornarsinnaavoq, tamannalu pisuulluni amerlasuut uniinnartarput.", Maren oqarpoq nangillunilu:"Kalaallit Nunaanni imal. Danmark-imi ilinniarniaraanni qallunaatut oqalussinnaanissaq pingaaruteqarluinnarpoq piginnaasarlu taanna pinngitsoorneqarsinnaanani - tassanilu efterskole-miissimaneq sungiusaataalluarsinnaavoq. Imaassinnaasoq Allu-mi kajumissutsiminnik sulisut taakkuusinnaasut inuusuttut efterskole-rnerminnik aniguinissaannut pisooqataasut ilinniaqqinnissamullu ingerlariaqqinnissamut periarfissiisut", Maren Ottar Hessner oqarpoq. Nammineq piorsarsimassutsimit ungasissumiilluniAvijâja Jepsen Allu-mi kajumissutsiminik sulisuuvoq. 22-nik ukioqarpoq København-illu Universitet-iani statskundskab-i atuarlugu. Avijâja nammineq efterskole-rnikuunngilaq, kisianni Canada-mi ukiuni marlunni kostskole-rnikuulluni - taamatullu nalunagu angerlarsimaffimmiit ungasissumiilluni qanoq innersoq.“Taamani inuit ikitsut allannguerujussuarnikuupput, Allu-milu sulinera arlaatigut kingumut qujaniarninnit aamma tunngaveqarpoq. Piorsarsimassutsinnut ataatsimoorsinnaaneq angerlarsimanani qanoq pingaaruteqarsinnaatiginersoq nalunngilara”, Avijâja oqarpoq, kalaallinik taamani Canada-mi naapitsinngikkaluarluni indianer-inik ilalersorusuttunik ilaqartarsimagami taakkulu piorsarsimassutsimiit angerlarsimaffimmiillu ungasinnermi paasinnilluarsimammata.“Tusarnaallaqqillutillu saammarsaalluartaqaat, uannukartarlutik nerisassiorlutik Kalaallit Nunaannut angerlarsernerpaaninni. Uannut tamanna pingaaruteqarnikooqaaq”, Avijâja oqarpoq, qilanaarnerarlunilu efterskole-rtut kajumissutsiminnik sulisut ilagalugit naapinnissaannut.“Uagut [kajumissutsitsinnik sulisut] assigiinneqaagut, kisianni tamatta ajunngitsunik tunniussassaqarpugut Allu-lu assut sullikkusullugu”. Aperalugu qanoq nuannertigissanersoq Allu-mi aallartilluarpata, Avijâja akivoq: “Nuannernavianngilaq, nuannernermiit nuannernerusussaavoq”. 
Avijâja kajumissutsiminnik sulisut allat ilagalugit