"Asasakka Inatsisartunngortut: Nuna tamakkerlugu meeqqanut suliniutit pitsaasut ingerlaannarnissaat"

Qinersineq qaangiuppoq. Tamassi pilluaritsi nutaat aammalu misilittagallit inatsisartunut ilaasortat!Peqatigiiffik Kalaalit Meerataannit nuannaarutigaarput, meeqqat atugaasa pitsanngorsarnissaasa qineqqusaarnermi sammineqarluarmata. Tungitsinnit pingaaruteqarluinnartuuvoq qulequttaq; Meeqqat sapangitsoorutigit, siunissaq sapangissavarput.“Neriuuteqartuarpugut” Oqariartaaserput taannaavoq siulersuisuni siulitttaasoq Kirsten Bitsch taama oqarpoq. Isumaqagiippugut, neriunneq pingaarput. Ukiunilu makkunani suli neriuttuarpugut. Tassami ukiuni kingulerni kalaallit meerataannut suliniutit pitsaasuusimapput.  Pikkorilluinnartumik meeqqanut illersuisoqarpugut meeqqallu pisinnaatitaaffiinnik suliniuteqarlutik, nutaamik meeqqanut inatsisartaarnikuuvugut, inatsisartut inatsisaat nr. 20 , 26-iusunit 2017-meersoq meeqqat tapersorneqarnissaat pillugu, pingaartillugu meeraq inuusuttuararlu iluitsutut isigalugu tapersorneqassassut, nalilersuinermi meeqqat akuutinneqassasut tusarnianeqartarssasullu, ilaatigut meeqqat najorteqarsinnaanerat soorlu angerlarsimaffiup avataanut inissinneqassatilluni - malugisimavarput pisortaqarfinnit katufinnit aammalu ilinniartoqarfinnit tapersorneqartoq; Meeqqat tamarmik toqqisismasumik alliartussasut, taamaasiornikkut inooqataanermi unammilligassanut, ilinniarnissamut pitsaasumillu inuuneqarnissamut kajuminnerulernissaat anguneqarsinnaammat.Qineqqusarnerup nalaani peqataaffigivagut meeqqat qineqqusartunik ataatsimiisitinerat Qassimi ulloq tallimangorneq 20 apriili. Qiimmaallannaqaaq meeqat tusaallugit qanoq eqqarsaatigilluagaatigisunik apequteqartarneri qineqqusaartunut. Meeqqat apequtaasa ilagaat, atuarfinni taartaasartunut tiimerpasuit atorneqartartut qanoq iliuuseqarfiginiarneraat aammalu atuartitaanermut sipaarniartoqarnersoq assersuut nutaanik sanaartortoqarniarnersoq aserfatsaaliisoqassanersorlu atuarfinnik, nutaanik timmisartoqarfiliortoqassappat taava qanoq iliornikkut namminersorneq anguneqassanersoq, inuusuttut taama amerlatigisut suli ilinniagaqanngitsut. Apeqqutini tusaaneqarsinnaavoq meeqqat  siunissartik soqutigigaat, tusaaneqarsinnaavoq neriunneq piusoq. Tungitsinnit meeqqat apequtigisaat pingaarutilittut tiguneqarnissaat kaammattuutigaarput, qinigaaffimmilu sulissutigeqqullugit tulliani qineqqusaartoqalerpat uteqqinnginniassammata tamakkua apeqqutit.Suliassaqarpoq unamminartunik suli´, nangeqqittariaqanngitsunik nalunngilarsi tamanna. Tassami meerarpassuit pisariaqartitsipput isumassorneqarnissamik, pisinnaatitaaffigaammi.Aammaarluta qujarusuppugut, sulineq ingerlaqqissinnaalermat. Oqaasiinnaanngitsunik oqalunnerinnaanngitsunillu, kisiannili qanoq iliuuseqarnikkut piviusunngortinneqartussanik. Nunatsinni meeqqanut  iluaqutaasussamik nunallu siunissaanut. Tamannalu Peqatigiiffik Kalaallit Meerataanni suliniutigaarput suleqatigiissutigissavarpullu peqatigalugusi. Allattoqarfimmi pisortaq Nike Berthelsen aammalu allattuunerup Puk Draiby, Peqatigiiffik Kalaallit Meerartaat.